↑点上面[南湖文学]蓝字丨关注
吴建明方言配音散文|杜做酒
点击上方音频收听
作者简介：吴建明，退休职工。喜欢静坐一隅，将琐碎的流年絮语付与文字，在一盏茶香里，留下光阴的故事。
日脚过来真讲快，木知木觉，又要过年咧。老底子过年是一年当中顶大嗰事体，年脚边，要做酒、掸蓬尘、送灶神菩萨、杀猪、请太太……想当初，大人是认认真真，慎重其事；对吾拉小人来讲，一是嘴巴好馋一馋咧，二是好孛相，逃来逃去，东家进西家出。交关事体，看嘞眼里，哎个辰光是轧闹猛，箇辰光回想起来，倒是亲切又清晰。就讲酒，吾拉叫“杜做酒”。“杜”就是“自家”嗰意思，比方介讲，自家经嗰布叫“杜布”，自家养嗰鸡叫“杜鸡”……“杜做酒”就是自家做嗰酒。做酒想想看蛮难，不过会得做嗰人讲起来也还好。
做酒一般有嘞阴历十月份之后，箇辰光，新米碾出来咧，天觀么也冷咧，田里向嗰生活弗多，河水也蛮清。做酒嗰第一步先是拿糯米淘干净，用冷水浸介一昼时。浸好嗰米水沥干，放嘞木桶里蒸。老底子乡下侪有大灶头大镬子，蒸桶放嘞镬子高头正好。蒸介半个把钟头，蒸桶里嗰米就变成糍米饭咧，掇脱来一看，粒粒相似，玉色样气。箇辰光，吾拉小人有点馋，大人就会得捏一个饭粑粑畀吾拉喫。蒸桶里嗰热气散一散之后，慢慢较淋水过一过，实梗饭米糁就弗会得粘嘞一道。接落去，拿饭放到事先汏清爽嗰缸里，搇散嗰酒药着到饭里向，拌匀。酒药覅着光，留介点，隔一歇还要用。拌好之后，饭面拿手拍拍平，当中搲个凼。刚刚留脱来嗰酒药拿一碗温水泡开，慢慢较从面哴倒落去。秋收之后，专门有卖酒药嗰人上门叫卖，噶咾大部分人家侪弗是自家做酒药。听邻舍讲，酒药嗰做法是用一种吾拉叫辣茄草（书名称之为辣蓼）嗰籽，掿嘞面粉里向，做成一个个小团子，等伊发霉之后晒干就好用咧。吾拉看着嗰酒药有辰光面哴向还有霉印子；只有发过霉，才会得有曲霉。一般是十斤米配一粒酒药，不过酒药也有凶弗凶，噶咾介买酒药侪是认煞一个人买，实梗一般讲起来弗大会得豁边。
做到箇个一步，暂时告一个段落。酒缸盖牢，捂嘞砻糠里，呒没砻糠么就用稻柴，四沿转侪要捂牢，酒缸盖高头顶好再盖一条被絮。老底子乡下头拿破被絮来盖。实梗做，是为之发酵要有一定嗰温度。过介三昼时，就会得闻到酒香，不过箇辰光酒缸盖覅去扌枭开来，还弗曾发酵好咧，弗实梗只怕前功尽弃。总要过介一个礼拜，哪末好放水咧。吾总觉着放水嗰“放”字用嘞真讲好，箇个“放”弗单单是拿水加进去嗰意思，伊还有“弥漫、扩展”嗰含义。因为箇辰光，酒凼凼里已经有渗出来嗰酒，拿水放进去之后，酒就会得遍布整只缸。好像寻弗出还有比“放”更加贴切嗰字。水嗰用量一般是一斤米一斤水。再过介三五日，就好到酒缸里兠酒喫咧。
吾弗会得喫酒，噶咾讲弗出酒嗰味道。不过，有一通朋友聚会，台子哴有杜做酒，也有葡萄酒，吾看一看，除脱喫热饮，喫杜做酒同葡萄酒嗰比例是8:3，足见杜做酒味道弗错。老底子乡下头日脚过嘞弗宽裕，做好嗰酒尝尝鲜之后大部分要囥到年头哴再喫。平常辰光喫酒也呒啥菜来过，一只盐齑菜，一碗炒茭菜算蛮好咧，清汤光水嗰感觉。不过，有酒念头嗰人喫酒弗讲菜，捞一把炒毛豆放嘞台子哴，?一口杜做酒，拾几粒毛豆嚼嚼，看上去像神仙也介。后来乡下头日脚好过咧，年脚边弗单单是做一通酒，做两通酒嗰人家也蛮多，一缸弗曾喫完，一缸又好喫咧，喫到来年开春。也有嗰人家是拿酒放嘞甏里封好，埋嘞地下底，来年喫一甏起一甏，酒色清纯，也弗酸，噶末真是崭货。
南湖文学文学总顾问：吴顺荣 责任编辑：青峰
音乐总监：格格
文字排版：汪垚卿 吴敏
页面制图：小鱼
平台推广：李远鹏
编辑微信：nhzc991
投稿邮箱：1097100585@qq.com
真情温暖你我
文学点亮人生
微信：nhwx990长按左侧二维码关注
吴建明方言配音散文|杜做酒
